Երևանի քաղաքային իշխանությունները հանրային տրանսպորտի սակագինը բարձրացնելիս տրանսպորտային պարկի թարմացում էին խոստանում, պնդում, որ բարեփոխումներն առանց թանկացման հնարավոր չէ իրականացնել: Հինգ ամիս էլ չի անցել, հիմա արդեն հայտարարում են, որ նոր տրոլեյբուսների ձեռքբերման գործընթացն ավարտին չեն կարողանում հասցնել:
«Գնման գործընթացի շրջանակներում կնքված պայմանագրի արդյունքում Երևան համայնքի համար ձեռք են բերվել թվով 45 տրոլեյբուսները: Հաշվի առնելով, որ դեռևս ֆինանսական միջոցները նախատեսված չեն, խնդրում են հանձնարարականի ժամկետը երկարաձգել», - այսօրվա նիստին դիմելով քաղաքապետ Տիգրան Ավինյանին՝ ասաց գնումների վարչության պետ Վահան Պապիկյանը:
Զուգահեռ Երևանը միլիարդավոր դրամներ է կորցնում չգանձված տոմսերի պատճառով։ Գործակարգավարական նիստին ներկայացված տվյալները վկայում են՝ հունվարից մայիս ամիսներին ավտոբուսներով կատարվել է ավելի քան 1,8 միլիոն վավերացում, մետրոպոլիտենում՝ մոտ 489 հազար, իսկ տրոլեյբուսներում՝ ընդամենը 87,953։ Բացի դրանից, ավելի քան 87 հազար բացասական տարբերություն է արձանագրվել, այսինքն՝ այդքան ուղևոր ինչ-ինչ պատճառով չի վճարել ուղեվարձը։
Տիգրան Ավինյանը ցանկանում է QR համակարգի թղթային տարբերակը վերացնելով խնդիրը կարգավորել. «Թղթային տարբերակով QR կոդերի վերացումը պետք է ապահովենք այս ամառվա ընթացքում, հետևաբար «ԹելՍել»-ի մեր գործընկերների հետ հասկացեք՝ որ ամսվանից սկսած, ամենայն հավանականությամբ, օգոստոսի 1-ից սկսած թղթային տարբերակով չպետք է գործեն QR-ները, մեր խնդիրներից մեկը նաև դա է»:
Մայրաքաղաքում ծախսերը կարող են գերակշռել եկամուտներին. քաղաքի սեփական եկամուտների հունվար - հունիս ցուցանիշը նախորդ տարվա 6 մլրդ գերակատարումից անցել է թերակատարման՝ հիմնական պատճառներից մեկը տրանսպորտի թերհավաքագրումն է: Եկամուտների հավաքագրման կատարողականը 94 տոկոս է:
«Թերակատարման հիմնական պատճառ է հանդիսացել փոխադրավարձի շուրջ 2.5 մլրդ դրամ և նախագծման թույլտվության շուրջ 1.7 մրդ դրամ եկամուտներ թերհավաքագրումը», - մանրամասնեց քաղաքապետարանի եկամուտների հաշվառման և գանձման վարչության պետ Դավիթ Հակոբյանը:
Փաստացի խոստացված բարեփոխումներն ուշանում են, իսկ տրանսպորտային պարկում շարունակվում է շարժակազմերի անսարքությունը: Զեկույցների համաձայն՝ 40 ավտոմեքենա անսարք է, որից 10 MAN մակնիշի ավտոբուսներ են: «Երևան ավտոբուս» ՓԲԸ ղեկավար Բեգլար Կիրակոսյանը պատճառաբանեց՝ խնդիրը պահեստամասերի բացակայություն է: Քաղաքապետ Տիգրան Ավինյանը նկատեց՝ վիճակը ձգվում է արդեն կես տարի։
«Եթե այս տեմպով շարունակվի, այդ ընկերության հետ այլևս չենք կարողանա շարունակել համագործակցությունը: Սա վերջնական և հստակ փոխանցեք», - ասաց նա:
Տրանսպորտի սակագինը 100 դրամ պահելու կողմնակից ընդդիմադիր «Ազգային առաջընթաց» խմբակցության ղեկավար Արամ Թորոսյանին թերհավաքագրումնեը չեն զարմացնում: Վստահ է՝ թղթային QR-ների վերացումը խնդիրը չի լուծելու, լուծումը ինչպես այն ժամանակ, հիմա էլ, պնդում է,100 դրամ սակագնին վերադառանալն է:
«Ավելի վատ կլինի, նախ՝ տեխնիկապես այդ ամբողջ համակարգը պիտի կայացնես, մի 5 անգամ փորձարկես, հետո նոր մտցնես այդ համակարգը: Մեր ասածը դա է եղել այն ժամանակ, ու հիմա էլ է դա։ Դուք փոխանակ այդ թանկացումից սկսեք, նախ՝ իրեն ավելի արդիականացրեք, ստացեք ամբողջական 100 դրամով ամբողջ գումարները, ներհոսքը, տեսեք ՝ինչքան գումար է ստանում, որովհետև կանխիկն արանքից դուրս է եկել, հետո նոր մնացածն արեք: Հիմա փաստորեն իրենք պրավալ են տվել, մեզ էլ ասում են՝ բա գիտես MAN չենք կարող առնել, ավտոբուս չենք կարող առնել, մեր ներհոսքը քիչ է», - ասաց նա:
Թորոսյանը խնդիր է տեսնում քաղաքային իշխանության կատարած ծախսերի մեջ, իսկ ընդհանուր քաղաքային եկամուտների թերհավաքագրումները վատ վարչարարությամբ ու հարկերի բարձացմամբ է պայմանավորում. «Պետք է նաև փաստենք, որ տարբեր ոլորտներում հարկային պարտավորություններ են շատանում, և մարդկանց գործերը լավ չեն։ Մեր փոքր ու միջին բիզնեսի գործը լավ չի»։
Ավագանու ընդդիմադիր անդամը կարծում է, որ քաղաքային մի շարք ՀՈԱԿ-ներում ծախսերը պատշաճ չեն կատարվում: Իրենց ունեցած փաստերը, ըստ Թորոսյանի, վկայում են, որ գնումները և ծախսերն իրականացվում են ոչ օպտիմալ ձևով։ Մտադիր են այս հարցերի ուսումնասիրության համար դիմել, որ քննիչ հանձնաժողով ստեղծվի:
